Lo's profile拉布拉多心聲PhotosBlogListsMore  |  Tools Help |
拉布拉多心聲我和我，坐在月下，我的手握住我的手，我帶點害羞，告訴了自己，我的願望。 |
||||||
|
|
08/04/2009 就快生得35週啦﹗想起岩岩知道有bb果時，真係覺得有排都未生得，依家已經只剩返5個星期到，回想起懷孕的日子，真係滿有 上帝的恩典，一至三個月真係辛苦，日日都冇精神，又想嘔、又頭暈、又冇胃口，但係我唔會好似有d孕婦咁嘔到死去活來(好似我的同事，嘔到生)，感謝主﹗
4個月開始至到7個月就係最穩定、舒服的時候，一直以來，我都係私家醫生同政府健康院兩邊一齊產檢的，我工作的診所原先未搬之前的時候，同一層有婦產科，所以順理成章我就去咗果度睇喇，果度有兩位女醫生，一位係梁醫生，一位係陳醫生，梁醫生因為資歷深的關係booking好full，我選擇咗陳醫生，佢後生好多，又靚女，hehe...最緊要係好好人，佢知道我係去政府醫院生，唔會搵佢幫我接生，都好細心幫我，了解我的懷孕情況，一個月去見佢一次，照超音波，次次陳醫生都冇收我診金同超音波費用，只係要抽血驗唐士綜合症時先收化驗費，因為要send去化驗所。到了29週，係時間可以照4D，見到BB個樣的超音波，諗住陳醫生都係時候收返少少費用啦(因為照4D好貴，貴過普遍超音波，要成$1000有多架)﹗結果都冇收到，仲比埋DVD我地，真係好多謝陳醫生，佢無條件幫咗我咁多，令到我地可以節省好多產檢的費用，起碼都幾千大元架﹗又感謝主﹗
進入第8個月，身體開始好大的變化，進一步肥咗啦﹗肚又大咗好多，過咗30週，更加辛苦，開始水腫，行動開始緩慢、行多一陣都會好攰，心口有時又悶痛，又唔夠氣，呢d都係懷孕的徵狀，好多謝同事的體諒、關心，有時佢地仲擔心過我，hahaha...有次唔小心係張櫈度跌咗落地，嚇到d同事死，不過我自己都驚一餐，話比老公知，老公仲笑我肥虫跌落地，激死...又再感謝主，因為衪的恩手托住我。
同事話好意外我冇幾請過病假，因為當知道我有BB的時候，都諗住我要成日請假，點知大跌眼鏡，我係冇架，haha...所以我成個懷孕期間，上帝嘅恩典一直都冇離開我，衪令我安然度過，依家離生產的日子越來越近，心情當然緊張，好怕會痛成十幾廿個鐘先生得，又當心會有咩意外，不過我深信，上帝唔會離開我，衪會保守。
28/02/2009 29週啦﹗不知不覺已經29週啦﹗下個星期就30週了，仲有大約10星期Timothy就出世啦﹗日子過得好似好快，又好似好耐，真係希望快d到生產果日，因為可以過完呢段十月懷胎的日子，因為呢個大西瓜真係令到我原本靈活而又輕巧的體型(hehe...)變得笨重、緩慢，哈哈...老公仲笑我似條肥虫，佢仲話以前我係玉女，依家當然都係......不過係肉女，真係想打定啦﹗睇住黎啦﹗好快我就可以恢復昔日架啦﹗不過真係不得不承認依家係一位肥師奶。
另外，好想快d到生產日之外，又好怕生產時的痛楚，因為我選擇咗母親最偉大的決定，就係順產，因為我覺得如果冇經過辛苦的10級痛楚生產過程，真係體會唔到做媽媽的偉大，令我更加珍惜我嘅好母親，更加珍惜我孩子的寶貴。希望到時順順利利啦﹗唔好痛咁耐先生得出就可以架啦﹗
努力啊﹗ 29/01/2009 200狗開始啦﹗ai..ya..好似忘記咗有個msn spaces tim，好耐都冇update啦﹗一次過加多d嘢落去先得。
今年新年好似好忙咁...
年三十晚：返咗我家食團年飯，例牌大魚大肉，有盆菜、有雞、有斑、有鮑魚；
大年初一：去咗麻麻家團拜，一屋人一屋狗，真係好熱鬧，下午再去老公的姑媽度拜年，又係一屋人，健健仲比幾個細路追住玩，攰都攰死。之後又再比盧大爸同盧大媽叫返屋企食晚飯，話有好多剩菜wor，一早出門，夜晚先返屋企，健健同我地都攰到謝咗，健健仲成晚瞓係我地中間，動都冇動過，真係搞笑；
大年初二：諗住瞓到黃朝八晏，下午先去姑奶屋企，點知有瞓夢中比盧大媽的電話吵醒，叫我地出太子飲茶，噢.....當然，健健又點肯自己一個留係家中呢﹗飲茶、去姑奶家拜年、去老公婆婆家拜年、返奶奶家食開年飯，又係一早去到夜晚，健健已經攰到冇咗狗狗應有的型態了；
大年初三：一早7:30比屋苑的狗主朋友叫醒，叫我地一齊去放狗同埋去飲早茶wor，aiya...唔好啦﹗等我地一家三口瞓耐d先啦﹗11點先飲啦﹗於係瞓到10點幾起身，約埋d狗主朋友一齊去了樓下大八方飲茶，晚上叫咗盧細妹同佢男朋友及盧家倆老一齊去新星打邊爐，好好味啊﹗
今日大年初四：休閒嘅一日，終於可以正式灘抖下啦﹗晚上先去泊麗灣老公的朋友家食飯，聽日就返工啦﹗真係過咗一個好充實的新年。
我個肚？haha..當然已經係好大啦﹗25個星期啦﹗就快6個月了，肚一日一日咁大，體型又一日一日咁龐大，到就快生果時會唔會...連門口都出入唔到呢？haha... 03/12/2008 Timothy今日去醫生度覆診，17週啦﹗見到小Timothy又大咗好多啦﹗啊....Timothy呢個名係我地幫未來仔仔改架，即係尊崇上帝的意思，中文係提摩太，提摩太係聖經中的人物，自小就受聖經的教導，係一位年青的牧者。
希望小Timothy將來都係一樣，做一位尊崇上帝的兒子，唔好好似佢媽媽...我...咁對 神若即若離，哈哈.... 18/11/2008 一個尖下巴和兩個尖下巴...即係雙下巴啊...救命...今日同事打開佢櫃桶，我唔覺意睇到一張相，係一張見工時填的from，上面一張證件相，一位樣子甜美、下巴尖尖、長長卷卷頭髮的女子，於是我就話：「幾靚女wor，睇下幾瘦，有尖下巴架﹗」我同事就話喇：「唔係呀﹗依家都有尖下巴啦﹗不過係兩個打孖啫」。
唉...你地知唔知？我地講緊都係同一個女子啊﹗果個人就係...咪即係...我囉... 17/11/2008 健健係隻古惑的狗由於我的肚子越來越大，所以開始唔比健健豬上床瞓，老公買了間屋仔比健健，初時健健都有d怕呢間屋架，但係好快就習慣咗，好彩佢唔抗拒間屋仔，到了夜晚傻豬仔好想上床同我地瞓，老公叫佢入屋仔，佢只好死死地入去，但係瞓了一陣就出黎跳上床，於是老公又趕佢落去，要佢入返自己地盤，成功第一晚冇上床，點知...第二晚...第三晚...第四晚...之後得每一晚，傻豬仔都好乖咁唔使我地叫就走入自己的屋子瞓，只不過一到半夜，傻豬仔襯我地瞓到一d反抗能力都冇的時候先跳上床瞓，仲會好小心，唔會踩到我地，之後就可以係床上安睡到天光了.....
健健啊﹗點解你會咁古惑架？ 23/09/2008 見到啦﹗見到啦﹗今日係奇妙、興奮的一日，原因？當然唔係因為要打八號風球啦﹗本來聽日先去覆診，但係怕打風，所以今日就去了，終於見到個BB啦﹗仲見到佢心跳tim，跳下、跳下，好奇妙、好開心，如果老公都一齊見到實開心死佢，醫生話個胎已經有6週6日啦﹗聽日就7週，預產期係出年5月14日，真係好啦﹗天氣未係太熟。雖然仲係好細，但係已經經常感受到佢了，因為個肚成日都好似抽住咁，有時仲好似有d嘢頂住，又冇胃口食嘢、又成日作嘔作悶，又暈暈地，好攰啊﹗攰到所以連把長長頭髮都剪了，同事話依家個BB霸緊地盤wor，哈哈......
健健(我隻小狗)啊﹗你個地盤就快比人霸咗啦﹗哈哈哈....不過，我同爹爹都一樣咁錫你嘅﹗ 15/09/2008 放鬆d啦日日都好想瞓教，瞓極都好想瞓，夜晚又瞓得唔好，好容易醒，又成晚都要去洗手間，又唔知自己想做咩嘢，唉....呢d時間要挨幾耐呢？
蝦、蟹、魚生、牛肉......仲有好多，我都係好中意食嘅，依家唔可以啦﹗以前都會耐唔時買蟹返屋企同老公慢慢歎，wooo..有排都冇得食啦﹗
保持心情開朗、聽多d歌同音樂，聽歌、聽音樂就一定冇問題啦﹗心情開朗，唔可以怒氣，唉..希望啦﹗其實我有時都係舊"敏彊"。
時間過得快d啦﹗ 07/09/2008 迪欣湖半日游今日天氣真係好得利害，一大早就已經陽光普照了，星期日的放假日子，好耐未試過8:45am咁早就起身，打扮了差唔多一個鐘，10點同老公一齊揸車去接老公家姐一家，去青衣城同奶奶、ar婆同ar姨飲茶，之後就去了迪欣湖，我的侄仔Thomas真係開心，一去到就周圍走。可惜公園唔比動物入，如果唔係我地健健仲開心啊﹗
|
|||||
|
|
